فراکسیۆنی یەکێتیی نیشتمانیی کوردستان رەتیدەکاتەوە بە لابردنی بڕگەی تایبەت بە گەڕاندنەوەی 10٪ی پاشەکەوتی مووچەی فەرمانبەرانی هەرێمی کوردستان لە پرۆژەیاسای بودجەی عیراق رازی بووبێت.
ئەمڕۆ دووشەممە، کاروان یاروەیس، بڕیاردەری فراکسیۆنی یەکێتی لەئەنجومەنی نوێنەران رایگەیاند: شەوی رابردوو یەکێتی هیچ کۆبوونەوەیەکی لەگەڵ چوارچێوەی هەماهەنگی و هێزە شیعیەکاندا نەبووە.
وتیشی: "ئەو هەواڵانەی باس دەکرێن لەبارەی ئەوەی یەکێتی رازی بووە بەلابردنی بڕگەی گێڕانەوەی پاشکەوتی مووچە هەڵبەستراوەو پڕوپاگەندەیە".
یاروەیس دەڵێت: "ئێمە چۆن هەوڵماندا و چەسپانمان لە رەشنووسی بودجەدا، ئاواش بەردەوام دەبین تا لەناو دانیشتنی پەرلەمان پەسەند دەکرێ".
بڕیاردەری فراکسیۆنی یەکیتی راشیگەیاند: ئەو کەسانەی ئەم پڕوپاگەندانە دەکەن نوێنەریان لە لیژنەی دارایی پەرلەمان نییە و لە هاوپەیمانی ئیدارەدانی دەوڵەت نییە و بەس موزایدەیەکی بێزراوەو هیچی تر".
ئەمڕۆش مستەفا سەنەد، ئەندامی لیژنەی دارایی ئەنجومەنی نوێنەران لەپەیامێکیدا کە لە تویتەر بڵاویکردەوە، جەختیکردەوە، کە بە هەوڵی یەکێتی بڕگەی گەڕاندنەوەی پاشەکەوتی مووچەی بۆ پرۆژەیاسای بودجە زیادکراوە.