ماڵپەڕێکی هەواڵی سیاسیە
راپۆرت

كێ له‌پشت دۆخى عیراقه‌ ؟ ئه‌نوا پرێس له‌ راپۆرتێكدا زانیارى ئاشكرا ده‌كات

  2022-08-02  |    8995 جار خوێندراوەتەوە
ئه‌نوا پرێس
دۆخی عیراق ئەمجارە لەنێوان خودی شیعەكان تێكچووە، دەست تێوەردانی دەرەكی توانی لەتیان بكات و ئاگری شەڕێكی سەخت دروست بكات، بەجۆرێك باس لەراپەڕینی گەورەی شیعەكان دژ بەو دەسەڵاتەی لە دوای روخانی بەعسەوە هەر خۆیان خاوەنی بوون.

كێ نەخشە بۆ سەدر دادەنێت؟

شیعەكانی چوارچێوەی هەماهەنگی كە ئێران سەرپەرشتیان دەكات و لەژێر هەیمەنەی ئەو وڵاتەدان، باس لەوە دەكەن، ئەوەی روودەدات و سەدر سەرۆكایەتی دەكات سعودیەو ئەمریكاو ئیسرائیلی لەپشتەوەیە، شەڕێكە  هێندە بچووك نیە، ئەمە جگە لەوەی بۆ گەمارۆدانی زیاتری ئێرانە لەناو خاكی عیراقەوە، هاوكات بۆ لەت و پەتكردنی شیعەكانە.

ئێران خەریكی چیە؟

ئەوە چوار رۆژە دۆخەكە ژڵەژاوە، ئەمە یەكەمجارە سەدر و جەماعەتەكەی هێندە بەڕاشكاوانە سیاسەت دەكەن و دژی ئێران دەوەستنەوەو لەهەڕەشەكانی ئەو وڵاتە ناترسن، هەرچەند پێشتر ئەم دەست و بازووە پڕ جەماوەرە ئاینی و سیاسیەیان لە ئێرانەوە بۆ ماوەتەوە، بەڵام وەك ئەڵێن سیاسەت باوكی خۆی ناناسێتەوە.

هەموو زانیاریەكان باس  لە توڕەبوونی ئێران دەكەن، بەڵام توڕەبوونێك كە هێشتا لەچوارچێوەی خۆڕاگریدایە، كاردانەوەی گەورەی لێنەكەوتووەتەوە، سوپاسالاری ئێران دەڵێت: سوپا نزیك دەكەینەوەو هەر دەستێكی دەرەكی بیەوێت زیان بەئێران بگەیەنێت و لەبەرژەوەندیەكانیان بدات لەعیراق دەیبڕنەوە.

سوپا نزیكە

بەپێی زانیاریەكانی ئەنواپرێس، هەر لەدوای سەرهەڵدانی ئاڵۆزیەكانی بەغداوە، ئێران سوپای خۆی خستووەتە ئامادەباشیەوە ،ئەمە جگە لەوەی لەرووی هەواڵگری وتیمی ئیتلاعاتەوە زیاتر خۆیان تۆكمە كردوەو بەوردی چاودێری دۆخەكە دەكەن.

سەدر بەكوێ دەگات ؟

سەدر جگە لەوەی ململانێی نێوان شیعەكان دەكات و دەیەوێت لەهەموو باڵەكان باڵا دەست بێت، هاوكات دەیەوێت دەسەڵاتی سیاسی بگرێتە دەست و كۆتایی یەكجاری بەمالكی بهینێت، ئەو پێی وایە هادی عامری و سەركردەكانی تری چوارچێوەی هەماهەنگی لەبەر ئێرانە لەگەڵ مالكین، بەو چاوەوە تەماشا دەكات، كۆتایی مالكی ئەوان دێنێتە سەر رێگەی ئەو.

بەپیلان كاركردن 

ئەم جوڵانەوە نوێیەی سەدر كە پەرلەمان و ناوچەی سەوزی كۆنتڕۆڵ كردوە، بەتەنها بیرۆكەی خۆی نیە، بەڵكو لەروانگەی هەرێمیەوە پشتیوانیەكی بەهێز دەكرێت و هاوكێشە سیاسيەكان گۆڕانكاری گەورەیان تێدا دەبێت، ئەگەر  سەدر ئەم جوڵانەوەیەیی پێنەبرێتە سەر رەنگە لاوازبوونێكی درێژ خایەن ببینێت، بەڵام  لەئەگەری دووەم كە سەركەوتنی جوڵانەوەكەو هاتنە ژێر ركێفی دەسەڵاتی سیاسی سەدر دەباتە لوتكە.

كارە نهێنیەكان 

بەپێی زانیاریەكانی ئەنواپرێس، هەریەك لەپارتی و بەشێك لەسونەكان پشتیوانی تەواوی سەدرن، وە پەیامی نهێنی و پشتیوانی هەیە، هەربۆیە لەرووی میدیایی و تەنانەت كاری رێكخستنەوە بەشدارن.

پارتی ئەم جوڵانەوەیە بەباشترین دەرفەت بۆخۆی دەزانێت، لەبەر ئەوەی كێشەی پۆستی سەرۆك كۆمار بەتەواوی پەكی ئەكەوێت و دەگەڕێتەوە بۆ خاڵی سفر، هەروەها سونەكان بەشەری نێوان شیعەكان چۆن بێت و چۆن رووبدات كێشەیان نیە و هەرئەوان سود مەند دەبن.

ئێران دەست بەسەر عیراق دەگرێت 

بەپێی نوێترین راپۆرتی میدیاكانی بەریتانیا ئەم ئاڵۆزیە دەرفەتێكی زۆر گرنگە بۆ ئێران، كە زیاتر دەسەڵاتی خۆی بەسەر عیراقدا بسەپێنێت، بەپێی وتەی چاودێرانی سیاسی، ئێران كار لەسەر ئەوە دەكات، هێرشی پێچەوانە بكات و سەدر رابگرێتو راستەوخۆ تەواوی پۆستەكان لەعیراق یەكلا بكاتەوە، بۆ ئەوەش قائانی چوار رۆژە لەنەجەفەو كۆبونەوەی چڕی دەستپێكردوە.


>زۆرترین خوێندراو